काठमाडौं । ससुरालीमा गएर श्रीमतीको हत्यासँगै २ जनालाई खुकुरी प्रहार गरी घाइते बनाएर फरार पाँचथर तुम्बेवा– ४ निवासी असफल कुरुम्वाङलाई प्रहरीले पक्राउ गरेको छ ।
माइतमा रहेकी श्रीमतिलाई खुकुरी प्रहार गरी फरार रहेको कुरुम्वाङलाई शनिबार बिहान ७ बजे जिल्ला प्रहरी कार्यालय पाँचथरका प्रहरी निरीक्षक दिवस कुँवर नेतृत्वको टोलीले पक्राउ गरेको जिल्ला प्रहरी कार्यालय पाँचथरले जनाएको छ । उनलाई तुम्बेवा–५ पखेरे टोलबाट पक्राउ गरिएको हो ।
कुरुम्वाङले पुस २६ गते साँझ ८ बजे घरायसी विवादमा मिक्लाजुङ गाउँपालिका–३ आरुबोटेस्थित माइती घरमा रहेकी ३५ वर्षीया श्रीमती गोमा फियाकको खुकुरी प्रहार गरी हत्या गरेको प्रहरीले जनाएको छ ।
तुम्बेवा–४ स्थित घरबाट ससुराली घर पुगेका ३५ वर्षीय कुरुम्वाङले खुकुरी प्रहार गर्दा छिमेकी महेन्द्र श्रेष्ठ र गोमाकी आमा कान्छिमाया फियाक घाइते छन् ।घाइते दुवै जनाको बिर्तामोडस्थित बी एण्ड सी अस्पतालमा उपचार भइरहेको प्रहरीले जनाएको छ ।