काठमाडौँ । सामूहिक बलात्कारको आरोप लागेका कराँतेका दुई जना प्रशिक्षकलाई जिल्ला अदालत मोरङले कैद र जरिवानाको फैसला गरेको छ ।
सामूहिक बलात्कारमा दोषी ठहर भएका विराटनगर महानगरपालिका-४ का सुरज भनिने अमर सुवेदी र विराटनगर-३ का विनोद राउतलाई जनही ८ वर्ष कैद सजाय र ३ लाख रुपैयाँ जरिवाना हुने फैसला गरेको हो ।
न्यायाधीश अम्बिकाप्रसाद दाहालको इजलासले यसअघि दुवै जनालाई दोषी ठहर गरेको थियो । बुधबार कैद सुनाएको हो । मोरङ अदालतका सूचना अधिकारी ओमराज सुवेदीका अनुसार जबरजस्ती करणीतर्फ जनही ७ वर्ष र सामूहिक करणीतर्फ थप १ वर्ष गरेर ८ वर्ष कैद सजायको फैसला भएको हो ।
दुवै जनालाई जनही ३ लाख जरिवानासमेत भएको बताए । न्यायाधीश दाहालकै इजलासले उनीहरूलाई गत बुधबार कसूदार ठहर गरेको थियो । सुवेदी र राउत राष्ट्रिय खेलकुद परिषद्का स्थायी प्रशिक्षक थिए ।