![उद्योगी-व्यवसायीको समस्या समाधानका लागि अर्थ मन्त्रालयको ढोका सधैँ खुला : अर्थमन्त्री](http://media.assettype.com/dailynewsnepal%2F2024-01%2F8984bd3d-798a-4907-97ba-05c8f3099e85%2F9fd9a355_040f_4b53_a95d_1126de954331.jpeg?w=480&auto=format%2Ccompress&fit=max)
काठमाडौँ । अर्थमन्त्री डा. प्रकाशशरण महतले उद्योगी-व्यवसायीको समस्या समाधान र अप्ठ्यारा फुकाउन अर्थ मन्त्रालयको ढोका सधैँ खुला रहेको बताएका छन् ।
मोरङ व्यापार संघ एक्स्पोको समापन सभालाई सम्बोधन गर्दै मन्त्री डा. महतले उद्योगी–व्यवसायीका समस्या लिखित रूपमा पठाउन वा प्रत्यक्ष भेटेर समस्या हटाउन आग्रह गरेका हुन् । उनले नेपालमै उद्योग व्यवसायको माहोल बढाउन र रोजगारी सिर्जना गर्न समेत आह्वान गरेका छन् ।
उनले विदेशबाट फर्केर आएका युवाहरूले पूँजी र सीप लिएर आएको भन्दै उनीहरूलाई आधुनिक कृषिकर्ममा प्रोत्साहन गर्नुपर्ने बताए । सरकारको नीतिसमेत उनीलाई प्रोत्साहन गर्ने नै रहेको भन्दै उनले उत्पादनमा आधारित सहयोग सुनिश्चित गर्ने नीति सरकारले लिएको बताए ।
कृषि क्षेत्र आधुनिकीकरण गराउनु पर्ने आवश्यकता रहेको भन्दै उनले उद्योग व्यवसायीलाई समेत कृषि क्षेत्रलाई प्राथमिकतामा राखी लगानी गर्न आग्रह गरे । वर्तमान अर्थतन्त्रबारे बोल्दै उनले सेयर कारोबार बढ्दै गरेका, जग्गा कारोबारले गति लिएको, बैंकहरुले ब्याजदर घटाइरहेको भन्दै पर्यटक आगमनबाट समेत उत्साह फर्किएको बताए ।
नेपालको पूर्वाधारमा ठूलो समस्या रहेको भन्दै उनले पूर्वाधार र सडकको राम्रो व्यवस्था नभएकाले सम्भावित पर्यटकीय क्षेत्र उपयोग गर्न नसकिएको स्वीकार गरे । आउँदा दिनमा त्यस्ता परियोजनालाई प्राथमिकतामा राखेर बजेट विनियोजन गर्ने उनको प्रतिबद्धता छ ।
देशमा भविष्य छैन भन्ने नकारात्मक प्रचारले आत्मविश्वास कम भएको भन्दै उनले अर्थतन्त्रका सूचक सकारात्मक भएको अवस्थामा उद्योग व्यवसायी, नागरिक समाज र सञ्चारकर्मी सबैले सकारात्मक बहसको थालनी गर्नु पर्ने समेत बताए ।