![युक्रेनी सेनाको नियन्त्रणमा रहेका छोरा फर्काइदिन आमा तिलकुमारीको आग्रह](http://media.assettype.com/dailynewsnepal%2F2023-12%2F280fb05d-4384-480e-b99c-cf1b729a380a%2FMixCollage_13_Dec_2023_09_14_AM_203_1536x1024.jpg?w=480&auto=format%2Ccompress&fit=max)
दाङ । बाटोछेउ माथि घर, मान्छेहरु ओहरदोहर गर्दै थिए । केही अधैबैंसे महिला र लोग्ने मान्छेले नआत्तिनुहोस् छोरा जसरी नि घर आईपुगी हाल्छ भन्दै तिलकुमारीलाई सम्झाउँदै थिए ।
रुसी सेनामा भर्ती भएका दाङ तुलसीपुर-१८ बिजौरीका प्रतिक पुन युक्रेनी सेनाको नियन्त्रणमा रहेको खबर पाएपछि परिवारलाई सान्तवना दिन जानेहरुको आजभोलि भिड छ ।
युक्रेनी सेनाको कब्जामा रहेकै बेला प्रतिकले बोलेको एउटा भिडियो सन्देश परिवारलाई प्राप्त भएसँगै घरमा रुवाबासी चलेको छ । पढ्न भनेर बिद्यार्थी भिसामार्फत रुस पुगेका २२ बर्षीय प्रतीक दश दिनयता घरपरिवारको सम्पर्क नरहेको भन्दै आमा तिलकुमारी पुनले छोराको खोजतलास गरिदिन माग गरेकी छन् ।
मृगौला काम नलाग्ने भएर प्रतीकका बुवा ताराबहादुरको गतबर्ष निधन भयो । ऋणले थिलथिलो परेका परिवारलाई उकास्न ११ लाख रुपैयाँ ऋण थोपार्दै प्रतीक युक्रेनबिरुद्धको लडाईमा होमिएका हुन् ।
त्यसो त घर नजिक तुलसीपुर–१९ थानगाउँका ३७ बर्षिय रामचन्द्र खड्का पनि रुसी र युक्रेनी सेनाको लडाई परी घाईते भएका छन् । दश लाख रुपैयाँ खर्च गरी भारतको नयाँदिल्ली, हैदराबाद, हुँदै दुबईबाट उनी रुस पुगेका थिए ।
बायाँ खुट्टाको साप्रा र कम्मरमा बमका छर्रा र गोली लागेका खड्काको मस्कोस्थित एक अस्पतालमा उपचार भईरहेको छ । बाबुको उपचारपछि घरसम्म ल्याईदिन सरकारसँग छोरा हरिश खड्काले गुहार मागेका छन् ।
दुवैको घटनाले गाउँ पुरै शोकमा डुबेको छ । घर, परिवार, छोराछोरी कसरी पाल्ने भन्ने चिन्ताले घरमा बसेकालाई सताइरहेको छ ।