![तनहुँ १, बारा २ पनि आगामी बैशाख १० गते नै उपनिर्वाचन हुने](http://media.assettype.com/dailynewsnepal%2F2023-03%2Fafc74d02-42b3-4c74-9e1a-ad07dfedad13%2Felection_21.jpg?w=480&auto=format%2Ccompress&fit=max)
काठमाडौं । निर्वाचन आयोगले तनहुँ जिल्ला निर्वाचन क्षेत्र नम्बर १ र बारा जिल्ला निर्वाचन क्षेत्र नम्बर २ मा पनि आउँदो बैशाख १० गते उपनिर्वाचन गर्ने निर्णय गरेको छ ।
तनहुँ १ बाट प्रतिनिधि सभा सदस्यमा निर्वाचित हुनुभएका रामचन्द्र पौडेल राष्ट्रपतिमा निर्वाचित हुनुभएको र बारा २ बाट निर्वाचित रामसहाय यादव उपराष्ट्रपतिमा निर्वाचित हुनुभएकाले ती दुइवटा निर्वाचन क्षेत्रहरु खाली भएका हुन् ।
आयोगको सोमबार बसेको बैठकले प्रतिनिधि सभा सदस्य निर्वाचन ऐन, २०७४ को दफा ६८ बमोजिम संवत् २०८० साल वैशाख १० गते आइतबारका दिन तनहुँ जिल्ला निर्वाचन क्षेत्र नम्बर १ र बारा जिल्ला निर्वाचन क्षेत्र नम्बर २ मा उपनिर्वाचन गर्ने गरी निर्वाचनको मिति तोकिएको हो ।
साथै उक्त दिन बिहान ७ बजेदेखि बेलुका ५ बजेसम्म मतदान हुने गरी मतदानको समयसमेत निर्धारण गरिएको आयोगका सहायक प्रवक्ता सूर्यप्रसाद अर्यालले जानकारी दिनुभयो । चितवन क्षेत्र नम्बर २ मा भने आयोगले पहिला नै उपनिर्वाचनको मिति तोकेको थियो ।