![इङ्लिस प्रिमियर लिग : म्यानचेस्टर सिटीको सहज जित](http://media.assettype.com/dailynewsnepal%2F2023-12%2Fe7e69de5-724c-4885-bd79-9b58bd96e38b%2Fcity.jpg?w=480&auto=format%2Ccompress&fit=max)
काठमाडौँ । इङ्लिस प्रिमियर लिग फुटबलमा म्यानचेस्टर सिटी विजयी भएको छ । शनिबार राति भएको खेलमा सिटीले सेफिल्ड युनाइटेडलाई २–० गोल अन्तरले पराजित गरेको हो । सिटीलाई जिताउन रोड्रिले १४ औँ तथा जुलियन अल्भारेजले ६१ औँ मिनेटमा गोल गरेका थिए । जितसँगै सिटी १९ खेलबाट ४० अङ्कका साथ तालिाको तेस्रो स्थानमा छ ।
पराजित भएको सेफिल्ड भने पुछारमा रहेको छ । यसै गरी शनिबार राति नै भएको अर्को खेलमा म्यानचेस्टर युनाइटेड भने नटिङघम फरेस्टसँग २–१ गोलले पराजित भएको छ ।
पहिलो हाफ गोलरहित बराबरीमा सकिएको खेलमा निकोलस डोमिनगुएजले गोल गर्दै ६४ औँ मिनेटमा नटिङघमलाई अग्रता दिलाएका थिए । ७८ औँ मिनेटमा मार्कस रासफोर्डले युनाइटेडलाई बरबरीमा ल्याए । तर, ८२ औँ मिनेटमा मोर्गन गिब्सले गोल गर्दै नटिङघमको जित पक्का गराए । जितसँगै नटिङघम तालिकाको १५ औँ स्थानमा छ भने पराजित भएको युनाइटेड ७ औँ स्थानमा रहेको छ ।
यसैगरी अन्य खेलमा चेल्सीले लुटनलाई ३–२ ले पराजित गर्दा एसटन भिल्लाले बर्नलेमाथि ३–२ कै जित निकालेको छ । क्रिष्टल प्यालेसले बे्रन्टफोर्डमाथि ३–१ को जित निकाल्दा वुल्भ्सले एभर्टनलाई ३–० ले स्तब्ध बनायो ।