![पहिलो लेगमा फुलहमविरुद्ध लिभरपुलको पुनरागमन जित](http://media.assettype.com/dailynewsnepal%2F2024-01%2F7112b105-0e4f-4c38-8f6b-d680779c1aad%2FLeage_cup.jpg?w=480&auto=format%2Ccompress&fit=max)
लन्डन । लिग कपअन्तर्गत सेमिफाइनलको पहिलो लेगमा लिभरपुलले फुलहमलाई पराजित गरेको छ । एनफिल्डमा लिभरपुलले फुलहमविरुद्ध २–१ गोल अन्तरको पुनरागमन जित दर्ता गरेको हो ।
भ्रमण टोली फुलहमले पहिलो हाफमा अग्रता लिए पनि जोगाउन सकेन । १९ औं मिनेटमा विलियनले गोल गर्दै फुलहमलाई अग्रता दिलाएका थिए । तर दोस्रो हाफमा ३ मिनेट भित्र २ गोल गर्दै लिभरपुलले पुनरागमन गर्यो ।
कर्टिस जोन्सले ६८ औं मिनेटमा बराबरी गोल फर्काए । त्यसको ३ मिनेटपछि वैकल्पिक खेलाडी कोडी गाक्पोले डार्विन नुनेजको पासलाई गोलमा परिणत गरे । त्यसपछि दुवै टिमबाट थप गोल हुन नसक्दा लिभरपुल २–१ ले विजियी भयो । योसँगै एक महिनाको अन्तरालमा लिभरपुलले फुलहमविरुद्ध एनफिल्डमा दोस्रो पटक पुनरागमन जित हात पार्यो । लिभरपुल एनफिल्डमा १६ खेलमा अपराजित छ ।
दुई टोलीबीचको दोस्रो लेग जनवरी २४ मा क्रभेन कुटेजमा हुनेछ । जहाँ योर्गेन क्लोपको टोली कीर्तिमान विस्तार गर्दै १० औं पटक लिग कप जित्ने अपेक्षालाई जिवित राख्ने योजनामा हुने छ ।