![प्रधानमन्त्रीको ट्वीटर एकाउण्ट ह्याक, अनुसन्धान गर्न प्रहरीलाई पत्र](http://media.assettype.com/dailynewsnepal%2F2022-12%2Fcd228153-356e-4571-bf77-f0b929ac5ee7%2Fprachanda_9VcTE3lvGF.jpg?w=480&auto=format%2Ccompress&fit=max)
काठमाडौँ । प्रधानमन्त्री तथा मन्त्रिपरिषद्को कार्यालयले प्रधानमन्त्रीको आधिकारिक ट्वीटर एकाउण्ट ह्याक भएको सम्बन्धमा अनुसन्धान गर्न प्रहरी प्रधान कार्यालयलाई औपचारिक रूपमा आग्रह गरेको छ ।
शुक्रबार प्रहरी महानिरीक्षकलाई सम्बोधन गर्दै प्रधानमन्त्री कार्यालयले पत्र लेखेको हो । जहाँ ‘उक्त घटना के कसरी हुन गएको र अब उप्रान्त त्यस्ता कार्यहरू हुन नदिन अपनाउनुपर्ने सावधानी र उपाय सहितको विस्तृत अध्ययन प्रतिवेदन पेस गर्न’ भनिएको छ ।
प्रधानमन्त्री तथा मन्त्रिपरिषद्को कार्यालयका अनुसार बिहीबार ट्वीटर एकाउण्ट ‘पिएमओ नेपालमा अनाधिकृत रूपमा प्रवेश गरी असम्बन्धित ट्विटहरु’ भएको थियो ।
तर, बिहीबार नै ह्याक भएको उक्त ट्वीटर एकाउन्ट पुनः सञ्चालनमा ल्याइएको अधिकारीहरू बताउँछन् । टू एफए लगायतका सुरक्षा उपाय अपनाउँदा समेत अनधिकृत प्रवेश भएकाले त्यसबारे विस्तृत छानबिन गर्नका लागि प्रहरी प्रधान कार्यालयलाई प्रधानमन्त्री तथा मन्त्रिपरिषद्को कार्यालयले पत्र लेखेको हो ।